A invertí 12 mion florin den e propiedat
Renaissance Curaçao Resort & Casino a finalisá su remodelashon i ta kontentu di por desvelá un diseño moderno i un estétika chic. Esaki ta nèt na tempu pa ‘high season’. Pa selebrá su éksito kontinuo komo un propiedat klave den Kòrsou su industria turístiko, a remodelá e lobby, 223 kamber, e casino i Nautilus Restaurant. Tur esaki resultado di un invershon di 12 mion dòler den e propiedat, “Nos meta tabata pa reflehá e beyesa natural di Kòrsou ku un atmósfera trankil i relahante,” esaki di akuerdo ku General Manager, Maylin Trenidad. “Huéspetnan por disfrutá awor di un diseño mas moderno ku ta reflehá tambe Kòrsou su raisnan i e marka di Renaissance.” Pa e remodelashon aki a partner ku Dash Design, un tim di diseñadó renombrá for di New York, i a krea un fusion di elementonan moderno paden i pafó.
Awor e lobby ta figurá un atmósfera íntimo i relahante pa huéspetnan disfrutá na yegada i tambe durante di nan estadia. Esaki ta keda reflehá den tur kos, for di e muebelnan te na e arte di Bon Biní riba e muraya. Tambe Wind Creek Carnival Casino Curaçao, e casino mas bishitá na Kòrsou ta yama huéspetnan bon biní ku un entrada impreshonante. E casino mes ta figurá mas ku 250 mashin, 12 mesa i algu mas ku 1,500 meter kuadrá di entretenimentu. E kambernan tambe a keda revitalisá i awor ta figurá un fusion di elementonan urbániko i di naturalesa manera arte di serámika lokal i kolónan vibrante, pero subtil. A usa kolónan moderno pa krea un refugio privá pa tur huéspet. Tambe por anunsiá ku remodelashon na Nautilus Restaurant ta programá pa finalisá e siman benidero, di manera ku huéspetnan por disfrutá di un área kulinario internashonal ku aksentonan lokal. Awor Nautilus por brinda asiento na 120 persona, tantu paden i pafó. E Blue Bar lo ofresé próksimamente un variashon di diferente aksento di e popular “Blue Curaçao” cocktail.
Resientemente Renaissance Curaçao Resort a keda nominá pa USA Today 10 Best Readers’ Choice travel awards 2020 den kategoria “the Best Caribbean Resort”. Kantidat di voto di kada bishitante di e wepsáit lo resultá den e fórmula final pa saka e ganadó den kada kategoria. Por vota tur dia; 1 bes pa dia, te ku dia 3 di febrüari, 2020. Vota dor di ‘klik’ e link https://www.10best.com/awards/travel/best-caribbean-resort-2020 Tuma nota; tur hende ku tin 18 aña bai ariba por vota. Esnan residensiá den Union Oropeo (EU) no por vota den e tanda aki. Lo anunsiá e ganadónan dia 14 di febrüari 2020 riba e websáit mes. Pa mas informashon por bishitá www.10best.com/awards/
Comments